Sunday, February 19, 2012

保守你心

我在,我還在。

衝了好幾個月,在公在私也在經歷一些轉變,諗起都覺得好 crazy。不過呢,不按常理出牌已經當食生菜,沒有最 surprise,只有更 surprise,所以講到尾都無乜野可以再 surprise 到人啦。

率性當然有好有唔好,不過活在一個咁 crazy 的社會,日日揭開報紙都係一大堆謊言或垃圾資訊,上 Facebook 又係一大埋假象同垃圾資訊,唔再停一停去聆聽自己內心的聲音,真係好容易迷失。前排有個朋友同我講起,覺得自己個人越來越躁,經常都不滿好多野,又經常將呢一種不滿表達出來,結果後遺症逐漸浮現。聽到都好明白,雖然社會上有好多不平事需要拎出黎講,但係與此同時唔少亦濫用言論空間,自以為係度不平則鳴,其實係有時無時都看不慣,唔理三七廿一就鬧左先。

係呢個時候,我心裡面響起聖經一句說話﹕「你要保守你心,勝過保守一切;因為一生的果效,是由心發出。」雖然我不是信徒,但呢個說話真係好大提醒,無論社會點糟糕,氣氛點惡劣,我地都唔應該任由自己的心靈淪陷。

聽一位朋友講過,根據某某研究,一個人係可以訓練自己個心 (腦),建立不同的信念,如果你用十年時間去令自己相信呢個世界係無藥可救、某某人係十惡赦,咁你就同樣需要十年時間去令自己去除呢種已經植根你心靈的想法。既然係咁,點解唔注入一些正能量呢?當我地努力咁去做好人、做好事、想好事情、有好心機,呢種投資係有回報的,會係未來好多好多年既動力。諗落都有實証,就以身邊一些係美滿家庭成長的人為例,佢地係比較單純,但亦比較正面,雖然佢地無經歷高低起伏、不幸家庭然後再自力更新的人咁有啟發性,但我越來越覺得,結識多一點思想正面的人,點講都不會是壞事,係佢地身上一樣有好多值得學習的地方。

係德國生活過一段時候,我認識左唔少「特別」的人。話佢地「特別」,唔係真係因為佢地有咩咁特別,或者有驕人成就,而係佢地同我係香港識的人相當不一樣。佢地大部分既特質都係幾 care-free,面對問題總係有 solutions,無好既 solutions 都總會有 way out,而佢地既 solutions 或 way out 絕對唔係投訴,而係一個正面的想法,或純粹 take it easy。

雖然好多人覺得歐洲人都唔會點需要捱,因為佢地眼中既歐洲人係有好多公共福利,讀書唔使錢讀到想讀完為止,社會又開放,容納到好多種唔同既生活態度/方式/主義,就覺得做香港人或亞洲人特別多壓力,而輕視其他人所面對的現實。我曾經遇到有人跟我說,我花時間去認識歐洲或去當地生活,都是徒勞的,因為當地人根本無法理解我,不會有真正的溝通。這些說話出自未去過歐洲的人口中,其實我覺得,都幾大膽。無論在世界任何一角落,只要你肯踏出一步,一定會找到知音人的。一定會。

為了這些未知的知音人、有心人、同路人,好好愛護自己的心靈吧。

No comments: